सिरहा प्रहरीको सफलता ,कोइला बोकेको ट्रकभित्र बरामद भयो लागुऔषध

सिरहा, १५ माघ । सिरहाको गोलबजारमा प्रहरीले चेकजाँचका क्रममा कोइला बोकेको ट्रकबाट लागुऔषध बरामद गरेको छ ।

कोइला बोकेर पश्चिमतर्फ जादै गरेको ना ५ ख ६००८ नम्बरको ट्रकमा सवार व्यक्तिहरुको साथबाट लागुऔषध बरामद भएपछि ट्रकका चालकसहित चार जनालाई प्रहरीले नियन्त्रणमा लिएको हो । पक्राउ पर्नेमा जिल्ला मकवानपुर हेटौडा नगरपालिका ७ बस्ने बर्ष २३ को ट्रक चालक भेष बहादुर खड्का, सोही ठाउँ बस्ने बर्ष २३ को बिजय थिङ, जिल्ला बारा निजगढ ९ बस्ने बर्ष २० को सह-चालक बिकास लामा र बर्ष २३ को मिलन तामाङ रहेका छन् ।

विशेष सुचना पाएपछि इलाका प्रहरी कार्यालय गोलबजारका प्रहरी निरीक्षक सन्तोष निरौलाको कमाण्डमा खटिएको प्रहरी टोलीले पूर्वबाट कोइला लिएर आउदै गरेको उक्त ट्रकलाई आज बिहान ६ बजे गोलबजार नगरपालिका ४ स्थित राजमार्गमा रोकेर चेकजाँच गरेको थियो ।

चेकजाँचका क्रममा ट्रकभित्र लुकाईएको अवस्थामा अवस्थामा १ ग्राम ४६० मिलिग्राम ब्राउन सुगर, आठ वटा स्पास्मोप्रोक्सिवन क्याप्सुल र १५० एम्पुल लुपिजेसिक, फेनारगन र डाइजेपाम नामक ईन्जेक्सन बरामद भएको इलाका प्रहरी कार्यलाय गोलबजारले जनाएको छ ।