मधेशप्रति मिडियामा विभेद अन्त्य हुनुपर्ने माग

दिनेश्वर गुप्ता लहान, १५ फागुन । नेपाल पत्रकार महासंघका केन्द्रीय अध्यक्ष डा.महेन्द्र विष्टले जारी संविधानमा संशोधन गरेर भएपनि मधेश र थारुको माग सम्बोधन गर्नुपर्छ भन्दै देशको आधा जनसंख्या संविधानप्रति असन्तुष्ट रहेकोको बताउंनुभयो । नेपाल पत्रकार महासंघ शाखा सिरहाको आठौं साधारणसभामा आज लहानमा अध्यक्ष विष्टले सो कुरा बताउंदै मधेश आन्दोलनमा भएको घटनावारे मिशन गठन गरेर अनुगमन गरियो । ठाउं ठाउंमा पत्रकारितावारे अन्तरक्रिया गरियो हामी विभेद हुन नदिने पक्ष रहेको उहांले बताउंनुभयो । अध्यक्ष विष्टले पत्रकारहरुको लागि दुर्घटना विमा, आमसंचार प्रतिष्ठान, संघीय अनुरुपको विशेष संरचना बनाउंदै संचारक्षेत्रलाई सशक्त रुपमा अगाडि बढाउंने बताउंनुभयो । नेपाल पत्रकार महासंघ सिरहाका सभापति देवकुमार यादवका सभाध्यक्षतामा भएको सो कार्यक्रममा पूर्वाञ्चल संयोजक गणेश पोखरेल र केन्द्रीय सदस्य गणेश लम्सालले पत्रकार आचार संहीता र श्रमजिवी ऐन कार्यन्वयन गर्न गराउंन सशक्त रुपमा अगाडि बढिरहेको बताउंनुभयो । त्यसैगरी, नेपाल पत्रकार महासंघ सिरहाका नि.अध्यक्ष तथा मधेश मिडिया मिशन नेपालका अध्यक्ष दिनेश्वर गुप्ताले मधेशको पत्रकारिताप्रति जुन विभेद भइरहेको छ, त्यो दुर्भाग्य हो । संचारक्षेत्रमै विभेद भयो भने अन्य क्षेत्रमा कस्तो अवस्था होला ? भनी प्रश्न उठाउंनुभएको थियो । अध्यक्ष गुप्ताले पत्रपत्रिकालाई महिनावारी लोककल्याणकारीको भुक्तानी दिने गरेको छ भने २५ लाखभन्दा बढी लगानी गरेका एफएफहरुलाई सोही अनुरुप सुविधा दिनुपर्ने माग गर्नुभयो । कार्यक्रममा प्रेस युनियनका सन्तोष सुवेदी र क्रान्तिकारी पत्रकार संघका मणिलाल विश्वकर्माले मौफसलका पत्रकारप्रति गरिएको विभेद अन्त्य होस् र श्रमजीवि ऐन कडाईका साथ लागु हुनुपर्ने बताउंनुभयो । यसैगरी प्रेस मंचका मनोज बनैता, पत्रकार सुरेन्द्र यादव, पत्रकार शिवकुमार साह र महिला पत्रकार रिंकु दासले मधेश र मधेशी पत्रकारलाई उपेक्षा गर्नु समावेशी समानुपातीलाई चुनौती दिनु हो बताउंनुभयो । कार्यक्रममा स्वागत मन्तव्य उपाध्यक्ष गणेश साह र कार्यक्रम संचालन जीवछ यादवले गर्नुभएका थिए ।

Trending : #स्थानिया